රජයේ අසාධාරණ බදු අය කිරීමට එරෙහිව හෙට සංකේත වැඩ වර්ජනයක් – GMPA
රජය විසින් ජනවාරියේ සිට ක්‍රියාත්මක බදු ක්‍රමය නිසා රජයේ වෛද්‍ය නිලධාරීන් මුහුණ දෙන ගැටළුවලට සංවේදී වීමට රජය අපොහොසත් වීම හේතුවෙන් සංකේත වැඩ වර්ජන ක්‍රියාමාර්ගයකට යොමුවීමට සිදුවී ඇති බව රජයේ වෛද්‍ය වෘත්තිකයන්ගේ සංගමය (GMPA) පවසයි. එම බදු ක්‍රමය මගින් රජයේ වෛද්‍ය නිලධාරියෙකුගේ වැටුපෙන් 36% දක්වා බදු අය කර ගැනීමක් සිදුවන බව ද ඔවුන් පෙන්වා දෙයි.
ඒ අනුව, 2023/02/08 දින පෙරවරු 8.00 සිට පැය 24ක සංකේත වැඩවර්ජනයකට එළඹීමට ඔවුන් තීරණය කර තිබේ.
පවතින ආර්ථික අර්බුදයත් සමග මේ ආකාරයේ බදු පැනවීම් ද එක් වූ විට නිවාස හා වාහන ණය, ඉන්ධන වියදම්, වාහන නඩත්තුව, දරුවන්ගේ අධ්‍යාපනය සහ එදිනෙදා පාරිභෝගික භාණ්ඩ මිලදී ගැනීම ඇතුළුව නිවසේ මූල්‍ය කටයුතු කළමනාකරණය කර ගැනීමට තම සාමාජිකයින්ට ඉතා අපහසු වී ඇති බව එම සංගමය පෙන්වා දෙයි.
රජයේ වෛද්‍ය වෘත්තිකයන්ගේ සංගමය (GMPA) සහ රාජ්‍ය අංශයේ තවත් බොහෝ වෘත්තීය සමිති විසින් බදු අය කිරීමේ ක්‍රමයේ ඇති අසාධාරණ සහ අතාර්කික ස්වභාවය පිළිබඳව අවධානය යොමු කිරීම සඳහා සිදු කළ බොහෝ දේ නොතකා රජය එය දිගින් දිගටම පවත්වාගෙන ගිය බව පෙන්වා දෙන එම සංගමය රජයේ වෛද්‍ය නිලධාරීන් ඒ වන විටත් තමන් සපයනු ලබන සේවාවේ ස්වභාවයට ප්‍රමාණවත් නොවන වැටුප් ක්‍රමය හේතුවෙන් අපහසුතාවයට පත්ව සිටි බවත්, ආර්ථික අර්බුදයට පෙර සිටම උද්ධමනය ඉහළ යමින් තිබුණද පසුගිය වසර 5 තුළ වැටුප් වර්ධක නොලැබුණු බවත් සඳහන් කරයි.
“බදු අය කිරීම සම්බන්ධයෙන් පහත සඳහන් කරුණු කෙරෙහි අපි අදාළ බලධාරීන්ගේ අවධානය යොමු කරමු.
- වත්මන් ආර්ථික අර්බුදය තුළ උද්ධමනය රජයේ සේවකයාට දරාගත නොහැකි මට්ටමකට පැමිණ ඇත. සියලුම තාර්කික ආර්ථික දෘෂ්ටිකෝණයන් තුළ උද්ධමනය යනු පාර්ලිමේන්තුවේ සම්මත වූ නීති සම්පාදනයක් නොමැති වුවද පාරිභෝගිකයා රජයට ගෙවන බද්දකි. එම බද්ද සමග රජය උද්ධමනය ඇති කරන්නේ තම වියදම් පියවා ගැනීමට අතිරික්ත මුදල් සැපයුමක් ඇති කරමිනි.
- උද්ධමනය නිසා විදුලිය, ප්‍රවාහනය වැනි සියලුම පාරිභෝගික භාණ්ඩවල මිල ගණන් ඉහළ ගොස් ඇති අතර, පොලී අනුපාත ඉහළ ගොස් රක්ෂණ වාරික පවා ඉහළ ගොස් ඇත. මේ නිසා රජයේ වෛද්‍යවරයකුගේ වැය නොකළ ආදායම (Disposable Income) බිංදුව ඉක්මවා සෘණ බවට පත්වන තත්ත්වයක් නිර්මාණය වී ඇත.
- ඉහත සන්දර්භය තුළ, රජයේ වෛද්‍ය නිලධාරියෙකුට වසරකට මාස 2 ක වැටුපක් උපයන විට ගෙවන බද්ද ලෙස අඩු කිරීම කිසිසේත් සිදු කළ නොහැක්කකි.
දැරිය නොහැකි උද්ධමන බද්දක් සහ පාරිභෝගික භාණ්ඩ මත පනවා ඇති දැවැන්ත වක්‍ර බදු ජාලයක් මත ක්‍රියාත්මක වන බදු ක්‍රමය ප්‍රායෝගික නොවන බව සහ දැඩි අසාධාරණ බව GMPA අවධාරණය කරයි.
නිවාස හා වාහන ණය, ඉන්ධන වියදම්, නඩත්තුව, දරුවන්ගේ අධ්‍යාපනය සහ එදිනෙදා පාරිභෝගික භාණ්ඩ මිලදී ගැනීම ඇතුළුව තම නිවසේ මූල්‍ය කටයුතු කළමනාකරණය කර ගැනීම අපගේ සාමාජිකයින්ට ඉතා අපහසු වී ඇත.
රජයේ බලධාරීහු අපගේ සියලු අදහස් නොසලකා හැර ඇති අතර, රටට සේවය කරන රජයේ වෛද්‍ය නිලධාරියාගේ දුක්ඛිත තත්ත්වය ගැන සංවේදී නොවන බව පෙනීයයි. එබැවින් 2023/02/08 දින පෙරවරු 8.00 සිට පැය 24ක සංකේත වැඩවර්ජනයකට එළඹීම හැර වෙනත් විකල්පයක් රජයේ වෛද්‍ය වෘත්තිකයන්ගේ සංගමයට නොමැත.
සෞඛ්‍ය ක්ෂේත්‍රයේ සියලුම වෘත්තීය සමිති ඒකාබද්ධ වෘත්තීය සමිති ක්‍රියාමාර්ගයක් දක්වා රට පුරා ව්‍යාප්ත ඒකාබද්ධ වෘත්තීය ක්‍රියාමාර්ගයක් දක්වා තත්ත්වය උග්‍රවීම වැළැක්වීමට රජය අවශ්‍ය ඉක්මන් ක්‍රියාමාර්ග ගනු ඇතැයි අපි බලාපොරොත්තු වෙමු.”
