ඇප ලැබූ ‘කංජිපානි’ තමිල්නාඩුවට රිංගයි

 ඇප ලැබූ ‘කංජිපානි’ තමිල්නාඩුවට රිංගයි

කුප්‍රකට පාතාල මැරයෙකු වන මොහොමඩ් නජීම් මොහොමඩ් ඉම්රාන් හෙවත් ‘කංජිපානි’ ඉම්රාන් ශ්‍රී ලංකාවේ අධිකරණයකින් ඇප මත මුදා හැර දින කිහිපයකට පසු රාමේෂ්වරම් වෙත රිංගා ඇතැයි පොලිස් ආරංචි මාර්ග සෙනසුරාදා ප්‍රකාශ කළ බව හින්දු පුවත්පත වාර්තා කර තිබේ.

වෙරළබඩ ප්‍රදේශවල සෝදිසියෙන් සිටින ලෙසත්, 2022 දෙසැම්බර් 25 වන දින රාමනාතපුරම් දිස්ත්‍රික් වෙරළ තීරයට ගොඩ බැසි ඔහු සහ ඔහුගේ සගයා සොයා බලන ලෙසත් තමිල්නාඩු බුද්ධි අංශ ප්‍රාන්තය පුරා ජ්‍යෙෂ්ඨ පොලිස් නිලධාරීන්ට අනතුරු ඇඟවීමක් කර ඇත.

මිනීමැරුම් සහ සාපරාධී බිය ගැන්වීම් ඇතුළු විවිධ වැරදි සම්බන්ධයෙන් ශ්‍රී ලංකා බලධාරීන්ට අවශ්‍යව සිටි ඉම්රාන් 2019 දී ඩුබායිහිදී අත්අඩංගුවට ගෙන යළි දිවයිනට පිටුවහල් කරන ලදී.

දේශීය මුදල් මිලියන 5 බැගින් වූ ශරීර ඇප දෙකක් මත අධිකරණය විසින් ඔහුට ඇප ලබාදෙන තෙක් ඔහු අධිකරණ භාරයේ සිටියේය.

ඇප මත මුදා හැරීමෙන් පසු ඉම්රාන් ඉන්දියාවට ඇතුළු වීමට සැලසුම් කර ඇති බවට මධ්‍යම බුද්ධි අංශවලින් සහ විශ්වාසදායක ආරංචි මාර්ගවලින් රාජ්‍ය බුද්ධි අංශයට නිශ්චිත තොරතුරු ලැබී තිබුණි.

ඔහු වෙස් වළාගෙන අධිකරණයෙන් පිටව ගොස් තලෙයිමන්නාරමට ගොස් එහි සිට ඔහුගේ සගයන් හරහා ඉන්දියාවට රිංගා ගැනීමට අවශ්‍ය කටයුතු සම්පාදනය කරමින් සිටි බව එම ආරංචි මාර්ග සඳහන් කළේය.

“ඉම්රාන් යනු ඇෆ්ගනිස්ථානයෙන් සහ පකිස්ථානයෙන් පිටවන හෙරොයින් සහ කොකේන් සැපයුම්කරුවන් සමඟ දැඩි සම්බන්ධතා ඇති මත්ද්‍රව්‍ය රජෙකි. ඔහුට ශ්‍රී ලංකාවේ නඩු කිහිපයක් තිබේ. ඉම්රාන් ඩුබායි හි උපන්දින උත්සවයකට සහභාගී වන බවට ලැබුණු තොරතුරක් මත විශේෂ කණ්ඩායමක් 2019 දී ඔහුව අත්අඩංගුවට ගත් අතර, ඔහුගේ කල්ලිය සමුද්‍ර මායිම් හරහා මත්ද්‍රව්‍ය ජාවාරමට සක්‍රීයව සම්බන්ධයි,” ජ්‍යෙෂ්ඨ පොලිස් නිලධාරියෙක් සෙනසුරාදා ද හින්දු පුවත්පතට පවසා තිබේ.

ඉම්රාන් ඉන්දියාවට පැන යාම සම්බන්ධයෙන් ශ්‍රී ලංකාවෙන් විධිමත් සන්නිවේදනයක් නොමැති නමුත් ඔහුගේ ව්‍යාපාරය පිළිබඳව බුද්ධි අංශවලට විශ්වාසදායක තොරතුරු ලැබී ඇති අතර අනතුරු ඇඟවීමක් නිකුත් කළ බව උපුටා දැක්වීමට අකමැති නිලධාරියා පැවසීය.

ඉම්රාන් තමිල්නාඩුවට ඇතුළුවීම වැදගත් වන්නේ අපරාධ චෝදනාවලට ලක්ව සිටින විදේශීය ජාතිකයන් රඳවා සිටින තිරුචි හි විශේෂ කඳවුරේ සිට ක්‍රියාත්මක වන ශ්‍රී ලාංකිකයන් සම්බන්ධ ජාත්‍යන්තර මත්ද්‍රව්‍ය ජාවාරමක් ජාතික විමර්ශන ඒජන්සිය හෙළිදරව් කරන පසුබිමකය.

කොමසාරිස්වරුන්/පොලිස් අධිකාරීවරුන්, විශේෂයෙන් වෙරළබඩ දිස්ත්‍රික්කවල අවදානම් ස්ථානවල නිරීක්ෂණ වැඩි දියුණු කිරීමට සහ සැකකරු සොයා ගැනීම සඳහා ඔවුන්ගේ බුද්ධි යන්ත්‍ර සක්‍රීය කිරීමට අනතුරු අඟවා ඇත.

Newspedia 01

Related post