“ලංකාවෙ රජයෙ සේවකයො හැසිරෙන්නෙ රජවරු වගේ” කොරියන් නිලධාරියෙක්ගෙන් ශ්‍රී ලංකාවටම පාඩමක්!
ශ්‍රී ලංකාවේ ප්‍රජාතන්ත්‍රවාදී දේශපාලන ක්‍රමයේ විධායකය, ව්‍යවස්ථාදායකය සහ අධිකරණය සහ අධ්‍යාපන ක්‍රමය ප්‍රතිසංස්කරණය කළ යුතු බව කොරියානු ආපදා සහන පදනමේ (KDRF) සභාපති චෝ සුං ලී මහතා පවසයි. රටේ යම් සංවර්ධනයක් දැකීමට නම් ජනතාවගේ මානසිකත්වය වෙනස් කළ යුතු බව ද ඔහු අවධාරණය කරයි.
වසර 40 ක් වැනි කෙටි කාලයක් තුළ දකුණු කොරියාව ලෝකයේ වඩාත්ම සංවර්ධිත හා බලවත්ම රටක් බවට පත් වූ ආකාරය සහ ශ්‍රී ලංකාවේ වත්මන් ආර්ථික පසුබෑම ජය ගැනීමට සම්බන්ධයෙන් අදහස් දක්වමින් ඔහු ප්‍රකාශ කළේය.
මෙම හමුව ඊයේ සමාජ සවිබල ගැන්වීම් අමාත්‍යාංශයේදී පැවැත්විණි.
“නව ගම්මාන ව්‍යාපෘති යනු සංවර්ධිත රටක් බවට පත්වීම සඳහා රටක් භූමියේ සිට ක්‍රියාත්මක කළ යුතු ව්‍යාපෘති වර්ගයක්,”
“දකුණු කොරියාවේ සංවර්ධන ව්‍යාපෘති ආරම්භ කළේ ගම්වලින්. මිනිසුන්ට කාර්යක්ෂමව හා ඉක්මනින් භාවිත කළ හැකි වන පරිදි අපි සියලු මාර්ග ඉදි කළා. එවැනි ව්‍යාපෘති ක්‍රියාත්මක කිරීමට දකුණු කොරියානු රජය අරමුදල් සම්පාදනය කළා,”
“ශ්‍රී ලංකාව සංවර්ධිත රටක් වීමට අවශ්‍ය නම් මිනිසුන්ගේ චින්තන රටාවද වෙනස් විය යුතුයි. ඒ සඳහා අධ්‍යාපන ක්‍රමය වෙනස් විය යුතුයි,”
“ගුරුවරු වෙනස් නොවුණොත් ලංකාව ගැන බලාපොරොත්තුවක් නෑ. ඒ නිසා මුලින්ම මිනිස්සුන්ගේ චින්තන රටාව වෙනස් කරන්න කලින් ගුරුවරුන්ගේ චින්තන රටා වෙනස් කරන්න ඕන”
“ශ්‍රී ලංකාවේ ළමයින් ජීවත් වන ආකාරය සහ ඔවුන් අත්විඳින දේ ගුරුවරුන් දැන සිටිය යුතුයි. අධ්‍යාපනික අරමුණු සඳහා අපට වඩා හොඳ සහ අලුත්ම ගොඩනැඟිලි අවශ්‍ය නොවේ. අපට අවශ්‍ය වන්නේ හොඳ ගුරුවරුන් ය, ”
“රාජ්‍ය නිලධාරීන්ගේ ප්‍රතිසංස්කරණයක් ඇති කළ යුතුයි. කවදාවත් හිතන්න එපා දේශපාලකයෝ රටේ ගෞරවනීයම මිනිස්සු කියලා.”
දකුණු කොරියාවේ ඕනෑම රාජ්‍ය ආයතනයකට එන සෑම පුද්ගලයෙකුටම රාජ්‍ය නිලධාරීන් ආචාර කිරීමට පුරුදුව සිටියද ශ්‍රී ලංකාවේ තත්ත්වය ඊට හාත්පසින්ම වෙනස් බවද ඔහු පැවසීය.
“රටක ජනතාව ස්වෛරී විය යුතුයි. නමුත් ලංකාවේ රාජ්‍ය සේවකයෝ හැසිරෙන්නේ රජවරු වගේ. ඒ නිසා ඒ විදියට ශ්‍රී ලංකාව වෙනස් රටක් බවට පත්වෙලා.”
කොරියානු ආපදා සහන පදනමේ (KDRF) සභාපති චෝ සුං ලී මහතා
