කොල්ලුපිටිය අනතුරේ රියදුරු අත්අඩංගුවට
සෙනසුරාදා අලුයම කොල්ලුපිටිය ප්‍රදේශයේ සිදු වූ මාරාන්තික රිය අනතුරෙන් පසු පලා ගිය බව කියන මර්සඩීස් රථයේ රියදුරු වන 26 හැවිරිදි පුද්ගලයා ඩුබායි සිට ආපසු පැමිණෙද්දී බණ්ඩාරනායක ජාත්‍යන්තර ගුවන් තොටුපොළේ දී අත්අඩංගුවට ගත් බව පොලිස් මාධ්‍ය ප්‍රකාශක, ජ්‍යෙෂ්ඨ පොලිස් අධිකාරී නිහාල් තල්දූව මහතා සඳහන් කළේය.
ඔහු ප්‍රකාශ කළේ ඔහුට විදෙස් ගමන් තහනමක් පනවා ඇති බැවින් ගුවන් තොටුපොළේ දී ඔහු අත්අඩංගුවට ගත් බවය.
සැකකරු සෙනසුරාදා උදෑසන රාත්‍රී සමාජ ශාලාවකට ගොස් ආපසු එමින් සිටියදී ඔහු පැදවූ Mercedes Benz මෝටර් රථය, ත්‍රිරෝද රථයක ගැටීමෙන් පැය කිහිපයකට පසු ඩුබායි වෙත පලා ගිය බව වාර්තා විය.
අනතුරින් ත්‍රිරෝද රථයේ රියදුරු මියගොස් ඇති අතර මෝටර් රථයේ ගමන් ගත් දෙදෙනෙකු තුවාල ලබා තිබේ.
අනතුර සිදු වූ වහාම මෝටර් රථයේ රියදුරු එම ස්ථානයෙන් පලා ගොස් ඇති අතර පසුව සැකකරු රටින් පිටව ගොස් ඇති බව පැවසිණ.
