රංගන ට ස්වර්ණවාහිනියේ දොර වැසේ?
ස්වර්ණවාහිනී නාලිකා ප්‍රධානියා ලෙස කටයුතු කළ රංගන ද සිල්වා එම ආයතනයේ සේවයෙන් ඉවත් කර ඇති බව වාර්තා වේ.
රංගන මින් පෙර හිරු නාලිකාවේ සිට ස්වර්ණවාහිනියට පැමිණියේ සුදේව හෙට්ටිආරච්චි සමගය. සුදේව ස්වර්ණවාහිනියේ ප්‍රධානියා වන විට රංගන ද එහි ඉහළම තනතුරකට පත් විය.
කෙසේවෙතත් පසුව සුදේව හිටපු ජනාධිපති ගෝඨාභය රාජපක්ෂගේ ජනාධිපති මාධ්‍ය අංශයේ අධ්‍යක්ෂ ජෙනරාල්වරයා බවට පත් වූ අතර, එහි කටයුතු කරන ගමන් ම ස්වර්ණවාහිනිය ද මෙහෙය වූ බවට චෝදනා එල්ල විය. නමුත් පසුව ගෝඨාභය ජනාධිපතිවරයාට ජනතා විරෝධය එල්ල වද්දී තමන් මාධ්‍ය අංශයේ තනතුරින් කල් තබා ඉවත් වූ බවට සුදේව නිවේදනය කළේ ගෝඨාභය රටින් පලා යන්නට ද ප්‍රථම ය.
රාජපක්ෂලාගේ ආධිපත්‍යය ගිලිහී යද්දී ස්වර්ණවාහිනී පාලනාධිකාරිය සුදේවට ද ඉවත් වන තැනට කටයුතු සිදු කළ අතර, දැන් රංගන ද සිල්වාට ද එම ඉරණම ම අත්ව ඇති බව ආරංචි මාර්ග පවසයි. කෙසේවෙතත් ඔහු ඉවත් කිරීමේ හේතුව මෙතෙක් හෙළි වී නොමැත.
සුදේව සහ රංගන ස්වර්ණවාහිනියට ආ පසුව සම්මානනීය නිවේදකයන් වන නදීක කරුණානායක, හරීන්ද්‍ර ජයලාල් සහ තිළිණි පෙරේරා වැනි දක්ෂයන් ඉවත් කිරීමටත් ඉවත් වන තැනට කටයුතු කිරීමටත් ක්‍රියා කළ ආකාරය රට තුළ මහත් පිළිකුලට ලක් වීම විශේෂත්වයකි.
