චීන තානාපති සහ මහින්ද හමුවී කතා කළ දේ!
ශ්‍රී ලංකාවේ චීන තානාපති Qi Zhenhong ඊයේ හිටපු ජනාධිපති මහින්ද රාජපක්ෂ හමුවී තිබේ.
එහිදී ශ්‍රී ලංකාව සහ මහජන චීන සමූහාණ්ඩුව අතර සුහද සබඳතා තවදුරටත් ශක්තිමත් කර ගැනීම සම්බන්ධයෙන් ඔවුන් දෙදෙනා පුළුල් පරාසයක කරුණු සාකච්ඡා කළහ.
චීනයේ සමාජවාදී ගොඩනැගීමේ නව සන්ධිස්ථානයක් වන චීන කොමියුනිස්ට් පක්ෂයේ එළැඹෙන 20 වැනි ජාතික සම්මේලනයට සුබපැතුම් පළ කරමින් හිටපු ජනාධිපති රාජපක්ෂ මහතා එම සාකච්ඡාවේදී ජනාධිපති ෂී ජින්පින් වෙත සුබපැතුම් ලිපියක් භාර දුන්නේය.
ශ්‍රී ලංකාව සහ චීනය අතර මිත්‍රත්වයේ, විශ්වාසයේ සහ අන්‍යෝන්‍ය අවබෝධයේ දීර්ඝ ඉතිහාසයක් ඇති බව ශ්‍රී ලංකාව සහ චීනය අද දක්වාම ඔවුන්ගේ සබඳතාවයෙන් පැහැදිලි වන බව හිටපු ජනාධිපති රාජපක්ෂ මහතාගේ සුබපැතුම් පිළිබඳව ස්තුතිය පළ කළ අතිගරු Qi Zhenhong මහතා පැවසීය.
ශ්‍රී ලංකාව මේ වන විට දුෂ්කරතාවන්ට මුහුණ දී සිටින බව නමුත් රට ඉක්මනින් යථා තත්ත්වයට පත් වනු ඇතැයි තමා විශ්වාස කරන බව තානාපති Qi සඳහන් කළේය. ශ්‍රී ලංකාවේ අභියෝග ජය ගැනීම සඳහා චීනයේ සහය ලබා දෙන බවට ද ඔහු සහතික විය.
ශ්‍රී ලාංකිකයින් චීනයට යාම සහ චීන සංචාරකයින් දිවයිනට පැමිණීම පිළිබඳ ප්‍රශ්නය ද හිටපු ජනාධිපතිවරයා මතු කළ අතර ඊට ප්‍රතිචාර දැක්වූ තානාපති Qi කියා සිටියේ ශ්‍රී ලාංකික ව්‍යාපාරිකයින්ට සහ සිසුන්ට දැනටමත් චීනයට පැමිණීමට වීසා ලබාදී ඇති බවත් චීනයේ COVID-19 පොදු ප්‍රතිපත්තියට ඉඩ දුන් වහාම චීන සංචාරකයින් යළි දිවයිනට පැමිණෙනු ඇති බවත්ය.
